زندگی چی یے۔ ۔ ۔ کے زانت۔ ۔ ۔؟ | بلوچی | مضمون | عالیہ شاہ

بلوچی/مضمون (ریپبلکن نیوز) زندگی چی یے۔ ۔ ۔ کے زانت۔ ۔ ۔؟
نبشتہ کار: عالیہ شاہ

زندگی چے یے؟
زند ءِ مانا ءُ متلب ءَ کے زانت؟
زندگی ءِ بندات چہ کجا ءُ آسر چہ کجا بیت؟
زند ءِ درس کے ءَ دربُرتگ؟
کس نہ زانت۔ ۔ ۔!

ہر کس ءَ چہ وت مانایے  بگندئے داتگ، متلب چہ متلب ءَ بلکیں کشّتگ، پرچا کہ سرجمیں دنیا ءِ تہا ہر کسی زند ءِ  رنگ ءُ بوہ دگہ دگہ دروشم ءَ انت، ہر کس کہ زند ءِ مانا ءِ شوہاز ءَ درکپیت آوتا گار کنت، بلے زند ءِ مانا ءَ آؤرت ءُ شوہاز کت نہ کنت۔


وہدءِ چست ءُ ایراں زندگی ءَ را ہما درس داتگ ات، آ نہ کتاباں مان ات ءُ نہ کہ وشیں گپانی تہا۔
زندگی وَ ہما انت کہ وہد ءِ چماں وتا گندئے، مارئے، پہ سگّ ءُ اوپار بازیں چیزاں دربرئے۔
من وتی ہر نیمگا زند ءِ شوہازگ ءَ اتاں اناگہ ءَ سما بوت کہ زندگی ہمیش اِنت کہ آئی ءِ تہا ہر وڑیں رنگ ءُ بوہ مان بیت، ہمے رنگانی شوہازگ ء َلگّ اِتاں، گڑا ہما مردم دیست اَنت کہ آیانی زندگی ءِ ہر واہگ ءِ سرجمی الّمی اِنت ءُ آ واہگاں زندگی سرپد بیت، بلے! وہدے کہ من دومی نیمگا حیال گْور کت ءُ چارِت، ہمے سما بوت کہ زندگی واہگانی سرجمی ءَ نہ گشنت، ہر چیز کہ رسیت آئی ءَ گوں مہر بہ بیت، آ واہگ انت، آ چیز نہ رسیت ءُ پدا ہم وش ءُ گل بوہگ ءِ نام زندگی انت۔ ۔ ۔ ۔
گڑا زندگی چے یے۔ ۔ ۔؟


اناں! زندگی ہما انت کہ آئی تہا واری ءُ بزگی ہمشامی ءَ واب کپگ ءُ پدا ہم رب ءِ شگر ءِ گرگ زندگی انت۔ ۔ ۔ اگن زندگی ہمیش انت گڑا مردم پرچا ایشی ءِ واستہ گنوک انت؟ زاناں زندگی ءَ وشی مہ رسیت آ زندگی، زندگی یے نہ انت؟


منی دل گشیت۔ ۔ ۔
اگن زندگی ءِ تہا ہرچی سرجم بوتیں گڑا آ زندگی سک بے لزت ءُ بے تام بوتگ ات، نہ کسے ءَ واہگ داشتگ ات ءُ نہ کسے ءِ زندگی ءِ واستہ زروک بوتگ ات۔
زندگی ءَ اگں سرجمیں دنیا ءِ چماں گوں بچاراں، گڑا آئی ءِ  بازیں رنگ گندئے، بلے اگں زندگی ءَ وتی نزیک گوْرا بچارئے، گڑا زندگی تہاریں شپانی وڑا ءُ چاردہ ماہیں شپ ءِ وڑا ہم گندگ ءَ کئیت بلے زندگی ءَ اگں مہر ءِ  چمّاں بچاراں گڑا زندگی چو پل ءَ انت کدی سرپیت کدی گیمریت۔ ۔ ۔ ۔


کس زانت نہ کنت کہ چوں۔ ۔ ۔
وہدے دیست کہ زندگی ایوکا وشی ءِ نام نہ انت ءُ ایوکا درد ءِ نام نہ انت درد ءِ  تہا بچکندگ ہم زندگی انت، وہدے کہ من حیال کت زندگی وتی دردانی تہا ہم وش لزت ءُ ڈولدار دیست، دل ءَ ہمے مارِت کہ اگں زندگی ءِ تہا ایوکا وشی بوتیں گڑا زندگی ہمنچو ڈولدار بوتگ ات۔ ۔ ۔؟


زندگ بوہگ ءِ واہگ تاں ہمے حدءَ  بوتگ ات۔ ۔ ۔ ۔؟
منی ھیال ءَ اناں!
اگن شپ ءُ روچ یک حساب بوتیناں گڑا بیزاری ءَ چہ مردماں وتی چم وت بند کتگ اتنت۔ زندگی من پُلّے لیکتگ ات کہ آئی ءِ وشی ءَ ہرکس مارِت کنت، بلے اے پل ءَ ہمینچو کنٹگ پر کہ زندگ بوہگ ءِ مارشت ءَ دینت، چہ ہمے کنٹگیں درداں سما بیت کہ زندگی زندگی انت۔ ۔ ۔ زندگی درچکے کہ ہر موسم ءَ رنگے ءَ بیت، کدی تاکچنڈ، کدی سبز ءُ بہار۔۔۔ ایشی ءَ زندگی گشنت گڑا؟
زندگی وہدے گوزاں بوت، وتا وت مانا کناں بوت کہ من ایشاں۔ ۔ ۔ ءُ من وہد ءِ  گوما زندگی ءِ مانا ءِ  شوہازگ ءَ تاں اِدِا سر بوتاں!


زندگی زندگی انت۔ زندگی وتا ہچ رنگ ءُ دْروشم نیست۔ زندگی آپ ءِ وڑا بے رنگ ءُ بے دْروشم، بے تام ءُ بے ذائقہ، بے بوہ ءُ بے باس انت۔
زندگی ءَ  ہما رنگ، ہما تام ءُ ہما بوہ دیگ بیت، زندگی ہما وڑ ءُ پیم گندگ بیت، ہما جشک ءَ جنت ہما بوہ ءَ مارگ بیت۔ ہر مکتبہءِ فکر ءِ مردم ءَ زند ہما وڑ ءُ پیم ءَ گندگ ءَ کیت اِنت کہ ہما فکر ءِ مردم بہ بیت۔ ھمے وڑا باز گشیت زندگی یک وابے، باز ءِ نز ءَ زندگی یک سفرے، باز زندگیءَ جہد ءُ کوشست گشیت باز، جست ءُ باوست ءِ نام ءَ دنت۔۔ باز ءِ حیال انت کہ زندگی یک گردشے، باز ھزمت ءُ باز عبادت ئِے گشیت، باز گشیت زندگی کشت ءُ کشاری ءِ نام انت ہرچی کش ئے ہما رُن ئے، زندگی یک مقصدے ءُ  یک مانا یے داریت۔ 
زندگی دل ءِ درد انت، زندگی مہر ءُ واہگ اِنت، زندگی ساچشست انت، زندگی یک رازے۔ ۔ ۔بہرحال۔ ۔ ۔!


زندگی وہدءِ میار انت زندگی ءَ برے روچ برے شپ، برے سُہب، برے بیگاہ، برے تہاروکی، برے رُژنائی، برے لنجی، برے ماہکانی، برے وش، سکّی، برے آبادی، برے ویرانی، برے کندگ، برے گریوگ۔۔۔ زندگی زیک مرچی ءُ باندا ءِ تہا گوزگ ءَ گشنت، ہمے لہتیں سالانی گوازینگ ءَ زندگی گشنت۔ اے درست زندگی ءِ رنگ ءُ دروشم انت۔ چرے رنگانی زبہریءَ زندگی مرگ ءِ ہمنام بیت۔ زندگی، مرگ، امیت اے سئیں ہمساہگ ءُ ہمراہ انت۔


زندگی مرگ ءِ نزیک تریں ہمساہگ انت، بلے آئی ءِ ہمراہ امیت انت۔ زند ءِ اولی گام مرگ ءِ نیمگا روت ءُ دومی گام امیت ءِ دامن ءَ کپیت، اِدِا ما اے ہم گشت کناں کہ زندگی امیت ءِ نام انت زندگی ءِ تہا امیت چہ مرگ ءَ شموشکار کنت، زندگی ءَ یک آسرے ءَ سر کنت، یک مقصدے ءِ تہا گوست کنت، زندگی ءِ ساچگ ءُ جوڑینگ ءِ واستہ امیت ءِ یک بلاہیں کمکے پکار انت، بے امیتی زندگی ءَ مرگ ءِ لنج ءُ تہاریں اگارانی تہا بیگواہ کنت۔ بوت کنت کہ زند ءِ راز امیت ءِ تہا انت۔ زند ءِ واب، زند ءِ سفر، زند ءِ جُست ءُ باوست، جہد ءُ کوشست زند ءِ کشت ءُ کشاری، ھزمت، عبادت، مقصد، مہر ءُ واہگ ءُ زند ءِ درستیں چست ءُ ایر اُمید ءِ نام گپت، میار ءُ باہوٹ انت۔ ہمے امیت انت کہ زندگی ءِ روچ ءُ شپ، سہب ءُ بیگاہ ءَ سفر جنان اَنت۔ گوں وہد ءَ تیلان انت، دیما روان انت، سالانی تہا گوزان انت، اے یک آزمودگیں گپے کہ امیت زند ءِ سر چمگ انت۔
امیت ءِ دامن دست ءَ انت زندگی گوْزان انت۔ ہما روچ ءَ امیت ءِ دامن چہ دست ءَ لگشت زند مرگ ءِ امباز ءَ بیگواہ بیت۔


ہر چون بہ بیت، زندگی بے اوست ءُ بے امیت ءُ ویران، ناکام، گار ءُ بیگْواہی ءِ ہر جان بیت۔ شاعر ءُ قلمکار زندگی ءِ راز ءَ لبزانی تہا ہر وڑا درانگاز کنت۔ کواس ءُ زانتکار امیت، ہمت، دلبڑی ءُ قربانی باریں دگہ چے چے لبزانی تہا کارمرز کنگ لوٹنت۔

مزید خبریں اسی بارے میں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
error: پوسٹ کو شیئر کریں