شهیدانی لوٹ ءُ انوگیں بلوچ تنظیمی جاور

کوئٹہ/مضمون (ریپبلکن نیوز) مکرانءُ بلوچستانءِ بازیں هندءُ دمگاں بازیں بلوچاں چہ زوراکءِ زوراوری ءَ لڈّءُبار کتگ، لہتیں ماں ایرانءِ سیمسری هنداں نشتگ ءُ لہتیں ماں کراچیءُ دگہ هندے داں زوراکیءَ بہ رکّ اَنت.

ءُ اے اوں پدّر ِانت کہ لڈءُ بار بوتگیں مردمانی توکءَ انچیں هاندان است کہ آ هاندانءِ مردم، هزیز، وارس شهید کنگ بوتگ انت ، یا زوراکانی دستءَ بیگواه کنگ بوتگ اَنت۔ بلئے لڈءُ بار ءُ درپہ در بوهگ ءِ پشتہ یک بلائیں واهگے است۔

انچیں هاندان است کہ آیانی چار ‘یا سئے چُکّ شهید کنگ بوتگ اَنت ءُ انگت هما هاندان پہ بلوچ جہدءَ دل پہک انت، اُمیت او سِتک دار انت کہ میڑ(جنگ) ءِ وهدءَ شهیدیں سنگتاں وتی هر گام دیمءَ ایر کتگ ءُ ستک ءُ اُمیت ہمے داشتگ کہ مارا چہ پد سنگت اے واهگءَ دیمءَ برنت ءُ وت ماں وت تپاکءُ یکجاه بنت۔

بلئے۔۔۔۔۔ انوں همے دیمءَ پیداک انت کہ بلوچ تنظیمانی وت ماں وتی جیڑه شهیدانی واهگانی دیمءَ چو البرزءِ کوہ ءَ ِمکّ انت۔

بلوچءَرا همے گمان دیئگ بوهگ ءَ انت کہ بلوچ تنظیماں تنیگ ءَ جوانیں راهشون نیست یا هر لیڈرے وت ءَ مزن کنگ لوٹ ایت۔ چوناها اے بھتام پیسرءَ جنَگ بوتگ اَنت کہ بلوچ رھشون وتی جندءِ زاتی نپانی پشتہ بلوچ قومءَ زوال ءِ نیمگ ءَ برگءَ انت۔

برے بی،ایل،اے جیہند او برے بی،ایل،اے آزادءِ وت ماں وتی جیڑه، بلوچ راج کجام تنظیمءَ بزور ایت او وتی بکنت؟ هرکس وتی صفائیءَ پیش کنت کہ من بلوچءِ درد واراں۔

پدا اے جیڈگی گپے کہ شهیدانی واهگ گوں کجام تنظیمءَ بندوک انت؟ بی ایل اے "جیہند”ءِ جہد پہ بلوچءَ نہ انت؟ یا بی ایل اے "آزاد” وتگڈیں تنظیمے۔۔ ؟

فدائیناں پہ کیا وتی نگرہیں ساه داتگ انت؟ بلئے زانگ لوٹیت کہ اے پیمیں وت ماں وتی ھلاپکاری بلوچءَرا یک نگیگیں آپسرےءَ سر کنت، هما آپسر کہ اودءَ رُزوائی ِانت۔

سوشل رسانکدر ءَ ءُ دیم پہ دیم گندگ بوهگءَ انت برے بی آر اے بیبگر او برے بی آر اے سربازءِ سنگت یکے دومیءَ هیر جن انت۔

ما تنیگہ وت ماں وتی جیڑهاں نہ گیشیتگ ایں ، آ وهدی کہ بی آر اے یکے اَت شرءُ پلگار ات بلئے نی سنگت دو جاگہ بیتگ انت سنگت برے سربازءَ ڈوبار انت ءُ برے بیبگرءَ بد گشنت۔

بلوچ راج توکءَ نفسیاتی جوڈ بیتگ کہ منی دردوار کجام انت، براس دیمءَ اتکگ یک پر اُمیتیں واهگے زاهر بوهگءَ انت، یکجاهی مئے منزل انت، آجوئی تپاکیءَ گون انت۔

اے پُرشتءُ پروش پما سبق انت کہ ما چنت ناسرپدی کتگ، خدارا راجءَ یک فلیٹ فارمےءِ سرا یکجاه کنگ ءِ جہدءَ بکنئے۔

چو مبیت کہ مئے دستءِ زهم پُلگ بہ بیت، شهیدانی واهگ تپاکی انت، وت ماں وتی جیڈھاں هلاس بکنئے، تپاکی مئے آجوئیءِ منزل انت۔

چو کہ برجانءَ وتی پربند ءَ گشتگ کہ

من ءَ بل جُست مکن کہ منی کسہ دردناک ِانت
کہ اے جاوراں تنیگہ منی راج ناتپاک انت

نیتک تازی یے چہ ڈنّءَ مئے نیتکہ هچ ٹکّے
گلیں مکران مئے جندءِ وتی سرڈگارءُ هاک انت

منی درداں کس نپیتکگ وتی لبّاں اے زمانگ
منی گوما سک دیریں کستیگءَ جنگءَ جاک انت

بدواهءِ دستءَ بژن انت پہ حسد مئے راج دپتر
چو بلوچءِ گلزمینءَ چُنڈ چُنڈءُ تاک تاک انت

منءُ بیوسیءِ نیامءَ بمریت یکے مرچی
دوئیں جیگ پہ جیگیں دیر انت جلیں نیمروچءِ ٹاک انت

هما زندءِ زگریں روچ انت کہ تہاریں پہ منیگی
برے دژمنیءِ ڈن انت برے دوستیءِ ڈاک انت

دگہ همل ے نگنداں نئے قمبرے پمیشکہ
کہ چو سمیءِ سریگءَ منی دل اوں چاک چاک انت

اگاں کس نہ منیت توری منا باور انت برجان
کہ چو مکہءُ قرآنءَ منی مکران پاک انت

نبشتہ کار: بابا بلوچستانی

مزید خبریں اسی بارے میں

Back to top button
error: پوسٹ کو شیئر کریں