گار ءُ بیگواہی ءِ جُنز | بلوچی | نبشتہ کار: عالیہ شاہ

بلوچی/مضمون (ریپبلکن نیوز) گار ءُ بیگواہی ءِ جُنز
نبشتہ کار: عالیہ شاہ

داں سر چِست کتگ، ہوش کتگ اے جُنز ہمے ھساب ءَ روان اِنت۔زی ءَ بگر داں مرچی ءَ زندے ہمُک روچ گوں ہمے ھال ءُ اھوال ءَ گوْازنت کہ مرچی نودربرے پاکستانی رسترانی دست ءَ ہوارجنگ بوتگ بلے اھوال نیست کہ کجا ءَ گار بوت، برے ماں میتگ ءَ ھال شنگ اِنت کہ مرچی تربت ءِ شہر ءَ دہ نوجوان پاکستانی بلّانی دپ ءَ ایّر بارگ بوتگ۔


ھال ءُ سوج گار اِنت، چُک چُک ہمے بہیم ءِ تہا زند گوْازینگ ءَ اِنت کہ مرچی آ اِنت باندا من ہاں، زی ءَ داں ہر نیمگ ءَ تُرس ءُ بہیم ہمیش بوتگ کہ مئے برات ءُ پتّ اللّٰہ تئی امن ءُ امان ءَ اَنت!


پُشت ءَ وہدیکہ چَک جناں چاراں گڑا گنداں کہ جمیل ءِ بیگواہی ءَ، ششّ ماہ سرجم اِنت ءُ طارق ءِ بیگواہی ءَ پنچ ماہ سرجم اِنت، فاروق بلوچ ءُ حمزا بلوچ ءِ ہمراہی ءَ ہوار جنگ بیت سال ئے ءُ نوہ ماہ سرجم بوت دوئیں نودربر تنی وہدی گار ءُ بیگواہ اَنت، شبیر بلوچ ءَ سے سال ءُ چار ماہ سرجم اِنت، ذاکر مجید ءَ پاکستانی رستریں لشکر ہوار جن انت ئِے داں مرچی بیگواہ اِنت آئیا یازدہ سال ہفت ماہ سرجم اِنت، ٹھیکہ دار سفر خان مری ءَ یازدہ سال سرجم بوت تنی وہدی گار اِنت۔


برے دگہ چینچو بلوچ اَنت کہ آئیاں سال ءَ چی بُرز گوْاستگ ھال ءُ اھوال وتی جاہ ءَ کسّ نہ زانت کہ کجا اَنت۔ آ وَ ھیر زیکیں گپ انت بلے مرچی گار ءُ بیگواہی ءِ جُنز اتکگ ءُ مات ءُ گہاراں سر اِنت۔


پاکستانی حیوانانی ہمت ءَ بچار کہ لوگاں چھاپہ جنت ءُ گُْشیت کہ زالبولانی درکار اِنت ہمے یکیں ماہ اِنت تنی وہدی ہفتگ سرجم نہ اِنت کہ ہر گوْرا ھال اِنت آس کپتگ کہ آواران ءَ بی بی سکینہ ءُ ماہ بی بی نامیں بزرگیں زالبول پاکستانی انسانی ھُون واراں ہوار جتگ انت۔ٹِک داتگیں روچ مرچی پدا دگہ اھوالے اتکگ کہ دو زالبول دگہ ہوار جنگ بوتگ، آواران ءِ دمگ ءَ پاکستانی زورا وریں رسترانی دست آں۔
انچوش ھال اِنت کہ چیز روچا ءَ پیسر بی بی سکینہ ءِ نوجوانیں بچّک 25 نومبر ءِ روچا گوں دگہ پرویز نامیں ہمراہے ءَ پاکستانی لشکرے دست ءَ گار ءُ بیگواہ کنگ بوتگ تنی وہدی ہچ سوج نیست کہ کجا گار بوت اَنت۔


آواران ءِ تہا دگہ ہم زالبول سعیدہ، نازل ءُ حمیدہ بریں دگہ چینچو انگت ءَ ہست کہ گار ءُ بیگواہ نوکی بنت، اِے ایّوکا اوّلی رَند نہ اِنت کہ بلوچ ءِ زالبول ہوار جنگ بوہگ ءَ اَنت ایشی ءَ چہ ساری زرینہ مری ءُ چینچو ہست کہ بے نام اَنت۔


بلوچ ءِ زندگی پاکستان ءِ تہا چینچو سسّتا اِنت، ہر روچ واب ءَ چہ پاد آہگ ءَ گوں سُہب ءِ بندات گار ءُ بیگوائیں مردمانی نام ءَ بیت۔


پاکستانی رسترہاں دنیائے تہا زاناں ہچ کس داشت نہ کنت!بلوچی ءَ بتل ئے کہ "میر ءِ شینک اِنت کِیچ ءُ تُوت ءِ پِر نیست” پاکستان ءِ چم جہلیں رسترانی ہم ھال ہمیش اِنت زاناں کہ میر ءِ شینک اَنت ہرچی کناں بلِے کناں، لوگ، ءُ جاہ، مردم ہچ نہ چار اَنت کہ کس آئیاں ہچ گُشت نہ کنت ءُ گُشگ ءِ واستہ مردم نیست۔


نّو وَ دْرست بہ زاننت ءُ بہ پہمیت کہ کن ءِ شر نہ کن ءِ  شر گناہ گار ءِ، نام ئِے بلوچ اِنت آئی سر ءَ اے سزا جزا ہر دو ہست انت۔ ۔ ۔ 


چمّ ہست بلے چاروک نیست، زبان ہست بلے ہبر کنوک نیست، اِے کہ مرچی دو زالبول ءِ ہور جنگ ءَ سے چار روچ ءَ دنیا ءِ سر ءَ زور انت ءُ پاد انچو بے توار بنت گُشئے ہچ نہ بوتگ۔اے وڑ ءَ کس پاکستان ءِ ھُون واراں داشت نہ کنت۔ ہمے چاروک، ہمے ہبر کنوک آواز ءَ وتی گیشّتر بُرز بہ کن اَنت۔بلوچستان ءِ تہا، چوشیں لوگ ءُ چوشیں مردمے نیست کہ اِے آس ءَ نہ کپتگ نہ سوتکگ۔ 
ہاں البت! ہما مردم کہ پاکستان ءِ جی ءُ جانی، سر ءُ دستی اَنت آ بلکیں پہرزیتگ اَنت۔
بلے! جی پہ بلوچانی دُوریں دانک کہ گُشنت "زمین ہمودا سوچیت کہ آس ءِ پر اِنت” مرچی وَ سرجمیں

بلوچستان ہمے یکیں آس ءَ سوچگ ءَ اِنت۔
اے گار ءُ بیگواہی ءِ جُنز داں کد روان کنت؟
داں کجا ءَ روان کنت؟
دِگہ چینچو سر بلوچانی گار بوہگ لوٹیت؟


دِگہ چُنت مات ءُ گہار بے پردگ بیت دِگہ چینچو برات ءُ بزرگیں پتّ ہوار جنگ بنت؟
پاکستان ءِ گڈی وہد ہمیش بوت کناں اگاں مرچی ہمے بندیں زبان ہم پچ بہ بنت گوں، ہمے آس ءِ کہ روک اِنت ہمے آس ءَ وتی ہواری ءَ پاکستان ءَ سوچیت گوں، اے گار بیگواہی ءِ کسّہ آسر بیت، الّم اگاں جہد گیشّتر بہ بیت۔ 


مرچی ہما روچ اتکگ درستیں بلوچ یک توار بہ بنت، مرچی بائد اِنت کہ زندگیں راج ءِ مُرتگیں باتن ءَ چہ زندگیں مارشت وہدی بہ بنت۔ ۔ کُل بلوچ مرچی بس بلوچ بہ بیت ءُ زالم ءِ دیم ءَ وتی حقانی جست ءَ بہ کنت۔ ۔


کہ ہیلت چی اِنت بلوچ ءِ میار چی اِنت ! اگاں مرچی توار بُرز نہ بیت گڑا باندا بوت کنت ہمے روکیں چراگ کہ گوات ءِ سرا ایر اَنت ایش ہم مرگ ءِ آماچ بنت۔ ۔نّو وہد ہمیش اِنت گِیشّتر چراگ روک بہ بیت ہمے روکیں چراگانی آس ءَ  پاکستان ءَ پُر ءُ جَس بہ کن ءَ اَت۔ ۔ ۔

مزید خبریں اسی بارے میں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
error: پوسٹ کو شیئر کریں